Математийн хичээлийн судалгаа
Сэдэв: “Математикийн хичээлийн судалгаа”
Илтгэгч: докторант Т.Ганбаатар, МУБИС-ийн МаСС-ийн Математик Боловсролын тэнхимийн багш
Хэзээ: 2012 оны 02 сарын 10-нд 16.20 цагаас
Хаана: МУИС, МКС, 310 тоот
Илтгэлийн хураангуй:
Математикийн боловсролын шинэчлэлийн энэ үед математик сургалтын зорилгыг амжилттай хэрэгжүүлэх асуудал чухал байсаар байна. Математикийн боловсролын стандартад математик сургалтын зорилгыг “сурагчдад математикийн хэл харилцааны, учирлан үндэслэхийн, загварчлахын, асуудал шийдвэрлэхийн гэсэн дөрвөн зүйл цогц чадамж төлөвшүүлнэ” гэж тодорхойлсноос хойш даруй 6 жил гаруй хугацаа өнгөрчээ. Энэ хугацаанд математикийн сурах бичгийн шинэчлэл, хөтөлбөрийн шинэчлэл гэх зэрэг олон шинэчлэл хийгдэж байна. Гэвч сурагчдын цогц чадамжийн төлөвшлийг үнэлэх тодорхой шалгуур, хэмжүүр байхгүй байна. Бид Японы ЖАЙКА байгууллага болон
БСШУЯамны хамтран хэрэгжүүлж буй арга зүйн төслүүдэд гүйцэтгэгчээр оролцсоны үр дүнд Япон улсын боловсрол, арга зүй, тэр дундаа математикийн сургалтын арга зүйгээс суралцах өргөн боломж нээгдсэн билээ. Япон улсын математик боловсролын түүхээс үзвэл математик сургалтын зорилго нь манай математик сургалтын зорилготой бараг ижилхэн байгаа нь биднийг тэднээс суралцах нэгэн үндэслэлийг тодруулж өгч байгаа юм.
Японы математик
сургалтанд нэвтрээд, нэлээн амжилттай хэрэгжиж, бусад улсуудын анхаарлыг татаж буй нэг чиглэл нь Open-End бодлого болон Open-End хандлага бүхий хичээл болж байна. Энэ хандлага нь сурагчийн бодох сэтгэх үйл ажиллагаанд суурилсан, бүх сурагчийг хичээлд идэвхитэй оруулах, сурагч бүр өөрийнхөөрөө бодох сэтгэх боломж олгодгоороо боловсролын философи, психологи, мэдлэгийн онолын үндсийг хангахуйц арга хэлбэр болж байгаа юм. Иймд бид энэхүү онцгой содон арга хэлбэрийг өөрсдийн математикийн хичээл дээр турших, хэрэгжүүлэх, нутагшуулах нь математик сургалтын арга зүйн хөгжилд нэгэн томоохон дэвшил авчрах боломжтой гэсэн таамаглал дэвшүүлж энэ сэдвийг сонгон авч судалж байна.
Энэхүү арга хэлбэрийг хэрэгжүүлэх, үр дүнг нь тооцох боломжтой арга нь сүүлийн жилүүдэд ЕБС-ийн сургалт, арга зүй, судалгааны ажилд нэлээн томоохон байр эзэлж буй “Хичээлийн судалгаа” юм. Хичээлийн судалгаа нь анх Японд үүсэн хөгжсөнөөс хойш 100 гаруй жил болж байгаа бөгөөд сүүлийн жилүүдэд дэлхийн олон улс орон хичээлийн судалгааны үйл ажиллагаа явуулж эхлээд байна. Иймд хичээлийн судалгааг амжилттай хэрэгжүүлснээр математик сургалтын үндсэн зорилго болох сурагчдад цогц чадамж төлөвшүүлэхэд дэмжлэг болох арга зүйг төлөвлөн хэрэгжүүлэх, сайжруулах боломжтой талаар энэхүү илтгэлд өгүүлэх болно.
Судлах эх сурвалж:
1. Хүүхдээр математикийн хялбар мэдлэг бүтээлгэх арга зүй. УБ. 2007.
2. Сурах үйлийн баримжаагаар суралцахуйг дэмжих арга зүй. УБ. 2008.
3. Хүүхдээр асуудал шийдүүлэх арга зүй. УБ. 2009.
4. Clea Fernandez, Makato Yoshida: Lesson study-A Japanese Approach Improving Mathematics Teaching and Learning. London. 2004.
5. Lesson plan template developed by Akihiko Takahashi
http://www.rbs.org/lesson_study/conference/2002/attachments/lesson_template.pdf
6. Lesson planning tool from the Lesson Study Research Group at Teachers College
http://www.tc.columbia.edu/centers/lessonstudy/doc/Lesson_Planning_Tool.pdf
